دلع نثية

بقلم الشاعر عبد المجيد المحمداوي –
ياخلقت بشر والصورج من طين
بهيده ويه الدرب بالخطوة من تمشين
شو جنج غزاله وشارده وي الريح
بيج اشكد تهده الباري بالتكوين
اقرب بالسكوت لراهبه بنص دير
ولوصف المغازل وانتي تلتفتين
المبسم والحواجب دورة اهلالين
والخد ياترافه لمسة البربين
والركبه جسر والشفه طعم الهيل
والصفنه عذاب وضايعه من اسنين
فخاتي البلصدر تفاحه بين اجفوف
اللون من الثلج والحلمه قمر الدين
وحوض الساحه مرمر والوتر من عاج
يابلور ضاوي وغطه عالتلوين
وياخصر السنابل خصرج الريان
ياطعم الشهد بالشفه من تحجين
ياطولج نخل بين الشجر مغرور
متباهي بحلاته من العسل والتين
ويشفافج ورد والورد لاحه الغيض
من شاف الشفايف حمرة معرسين
وعيونج بحر لون البحر والروج
وغاير من حلاتج كل شبر بالطين
يانظرة وداع وزلف مثل السيف
من يطعن بروحه السيف هم يلين
ماشايف دمع بعيونج الحلوات
بس شايف حزن حد طعنة السجين